Բելգիայի Թագավորությունում ՀՀ դեսպան Թաթուլ Մարգարյանը հանդիպում է ունեցել Բելգիայի Թագավորության Ներկայացուցիչների պալատի նախագահ Պատրիկ Դըվալի հետ

18 փետրվարի, 2020

2020թ. փետրվարի 18-ին տեղի է ունեցել Բելգիայի Թագավորությունում ՀՀ արտակարգ և լիազոր դեսպան Թաթուլ Մարգարյանի հանդիպումը Բելգիայի Ներկայացուցիչների պալատի նախագահ Պատրիկ Դըվալի հետ։

Կողմերն անդրադարձել են հայ-բելգիական հարաբերություններին, երկու երկրների խորհրդարանների միջև ընթացող ակտիվ փոխշփումներին, մտքեր փոխանակել համագործակցության խորացման հնարավորությունների վերաբերյալ։

Դեսպան Մարգարյանը և Բելգիայի խորհրդարանի խոսնակը կարևորել են երկու երկրների խորհրդարաններում ձևավորված բարեկամական խմբերի միջև փոխգործակցության ընդլայնումը, պատգամավորական պատվիրակությունների համագործակցությունը միջազգային կառույցների շրջանակներում:

Անդրադառնալով հայ-բելգիական համագործակցությանը ՀՀ-ԵՄ գործընկերության շրջանակներում, ՀՀ դեսպանը բարձր է գնահատել Բելգիայի խորհրդարանի, ինչպես նաև երկրի ռեգիոնալ և համայնքային օրենսդրական մարմինների կողմից՝ ՀՀ-ԵՄ Համապարփակ և ընդլայնված գործընկերության համաձայնագրի վավերացման գործընթացն ավարտին հասցնելը։ Այս համատեքստում, դեսպան Մարգարյանը համառոտ ներկայացրել է զրուցակցին ՀՀ-ԵՄ շարունակական քաղաքական երկխոսության և խորացող համագործակցության ընթացքը։

ՀՀ դեսպան Մարգարյանը ներկայացրել է նաև Հայաստանում տեղի ունեցող ժողովրդավարական և տնտեսական բարեփոխումների ընթացքը, Լեռնային Ղարաբաղի հակամարտության խաղաղ կարգավորման գործընթացը։

Կողմերն անդրադարձել են նաև Բելգիայի հայ համայնքի կարևոր դերին և նախաձեռնություններին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր