Հայաստանի դեսպանի դասախոսությունը Լյուվենի համալսարանում

12 դեկտեմբերի, 2024

Դեկտեմբերի 12-ին Բրյուսելում Հայաստանի դեսպան Տիգրան Բալայանը “Հայաստան-ԵՄ գործընկերությունը և ապագայի հեռանկարները” խորագրով դասախոսությամբ հանդես եկավ Լյուվենի կաթոլիկ համալսարանի “Եվրասիայի աշխարհաքաղաքական զարգացումներ” ֆակուլտետի շուրջ 170 սաների և պրոֆեսորադասախոսական կազմի առջև։

Դեսպան Բալայանը ներկայացրեց Հայաստանի և Եվրամիության փոխգործակցության աննախադեպ առաջընթացը։ Նա հանգամանալից կանգ առավ 2024թ. ընթացքում տեղի ունեցած հանդիպումների և ընդունված որոշումների վրա՝ ընդգծելով դրանց պատմական կարևորությունը։

Խոսելով Հայաստանի տնտեսական զարգացման հեռանկարների մասին՝ դեսպան Բալայանը կենտրոնացավ «Խաղաղության խաչմերուկ» նախագծի և տեղեկատվական տեխնոլոգիաների բնագավառների վրա։

Դասախոսությունից հետո տեղի ունեցած հարցուպատասխանի ընթացքում Տիգրան Բալայանն անդրադարձավ տարածաշրջանային խնդիրների լուծման շուրջ Հայաստանի մոտեցումներին, Հայաստանի պաշտպանունակության բարձրացման ուղղությամբ իրականացվող աշխատանքներին, Հայաստան-Ադրբեջան խաղաղության համաձայնագրի շուրջ բանակցություններին՝ ընդգծելով տարածաշրջանում տևական խաղաղություն հաստատելու և համագործակցային մթնոլորտ ստեղծելու հրամայականը։

Դասախոսության ավարտին դեսպան Բալայանը համալսարանի գրադարանին նվիրաբերեց Հայաստանի պատմությանն ու մշակութային ժառանգության վերաբերյալ գրքեր:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր