Հայոց ցեղասպանության 100-րդ տարելիցին նվիրված համերգ Բրյուսելում

26 ապրիլի, 2015

Ապրիլի 26-ին Բրյուսելում` Բելգիայի Արվեստների պալատի հռչակավոր համերգասրահում, կայացավ Բելգիայի ազգային նվագախմբի համերգը` նվիրված Հայոց ցեղասպանության 100-րդ տարելիցին: Համերգը կազմակերպվել էր Բելգիայի Արվեստների պալատի, «Քեզ համար, Հայաստա՛ն» փառատոնի և Բելգիայում ՀՀ դեսպանության կողմից:

Համերգին ներկա էին Բելգիայի մշակույթի նախարար Ջոել Միլկեն, ՀՀ մշակույթի նախարարի տեղակալ Արև Սամուելյանը, Բելգիայի պետական մարմինների ու ԵՄ կառույցների ներկայացուցիչներ, դեսպաններ, հայ համայնքային կառույցների ղեկավարներ և անդամներ, Բելգիայի հասարակության լայն շրջանակների և ԶԼՄ-ների ներկայացուցիչներ` թվով շուրջ 2500 մասնակից:

Միջոցառման մեկնարկին Բելգիայում ՀՀ դեսպան, ԵՄ-ում ՀՀ մշտական ներկայացուցիչ Թաթուլ Մարգարյանի առաջարկությամբ ներկաները մեկ րոպե լռությամբ հարգեցին Հայոց ցեղասպանության զոհերի հիշատակը:

Ողջույնի խոսքում դեսպան Մարգարյանը նշեց, որ Ցեղասպանության կազմակերպիչների նպատակն էր ոչ միայն բնաջնջել հայ ազգը, այլև` նրա դարավոր և հարուստ մշակութային ժառանգությունը: Ներկայացնելով մեր մշակույթն աշխարհին` մենք վերահաստատում ենք մեր հզոր մշակութային ավանդույթները, կիսում մեր երաժշտության, արվեստի բերկրանքը մեր բարեկամների հետ: Դեսպանն ընդգծեց մշակույթի պահպանման ու հարստացման հրամայականը և մշակութային երկխոսության զարգացման կարևորությունը չարիքի նկատմամբ քաղաքակրթության հաղթանակի գործում:

Համերգը, որը բելգիական պարբերականների կողմից անվանվեց տարվա կենտրոնական մշակութային միջոցառումներից մեկը, ղեկավարում էր հայտնի դիրիժոր Ջորջ Փելհիվանյանը, իսկ դրա մենակատարներն էին հռչակավոր երաժիշտներ Միշա Մայսկին, Սերգեյ Նակարյակովը, Մաքսիմ Վենգերովը: Համերգին հնչեցին Կոմիտասի, Արամ Խաչատրյանի, Պյոտր Չայկովսկու, Մաքս Բրուխի, Ալեքսանդր Հարությունյանի և երիտասարդ հայ կոմպոզիտոր Ալեքսանդր Իրադյանի ստեղծագործությունները:

Համերգը ջերմորեն ընդունվեց հանդիսատեսի կողմից և լայնորեն լուսաբանվեց բելգիական մամուլում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր