Փոխըմբռնման հուշագրեր Հայաստանի զարգացման հիմնադրամի և բելգիական մի շարք կառույցների միջև

08 հուլիսի, 2015

Հուլիսի 8-ին Բրյուսելում ՀՀ դեսպանությունում տեղի ունեցավ Հայաստանի և Բելգիայի միջև գործարար կապերի զարգացմանը նվիրված միջոցառում: Միջոցառման ընթացքում համագործակցության վերաբերյալ փոխըմբռնման հուշագրեր ստորագրվեցին մի կողմից` Հայաստանի զարգացման հիմնադրամի, մյուս կողմից` Վալոնիայի արտահանման և ներդրումների գործակալության, Վալոնիայի ձեռնարկությունների միության և Բրյուսելի առևտրի պալատի միջև:

Հայկական կողմից հուշագրերը ստորագրել է ՀԶՀ գործադիր տնօրեն Արման Խաչատրյանը, իսկ բելգիական կողմից` Վալոնիայի արտահանման և ներդրումների գործակալության գործադիր տնօրեն Պասկալ Դելկոմինետը, Վալոնիայի ձեռնարկությունների միության գործադիր տնօրեն Վինսենտ Ռեուտերը և Բրյուսելի առևտրի պալատի միջազգային բիզնեսի զարգացման գծով տնօրեն Սաբին Սուտանսը:

Իր ելույթում Բելգիայում ՀՀ դեսպան Թաթուլ Մարգարյանը նշեց, որ Հայաստանի և Բելգիայի առևտրի և ներդրումների խրախուսման մասնագիտացված գործակալությունների ու միությունների միջև համագործակցության ամրապնդումն ու խորացումն անկասկած դրական անդրադարձ կունենա այս բնագավառներում հայ-բելգիական գործակցության արդյունավետության բարձրացման, ձեռնարկատիրական շրջանների միջև շփումների ակտիվացման, փոխադարձ ճանաչելիության մեծացման վրա:

Հայաստանի զարգացման հիմնադրամի գործադիր տնօրեն Արման Խաչատրյանն ընդգծեց, որ համագործակցությունը հավելյալ հնարավորություններ կընձեռի կողմերին` համատեղ ծրագրերի իրականացման համար՝ ուղղված առևտրի և ներդրումների խթանմանը, արդյունաբերական, առևտրային և տեխնոլոգիական համագործակցության զարգացմանը:

Նախապատրաստական աշխատանքներն իրականացվել են Բելգիայում ՀՀ դեսպանության, Բելգիայում ՀՀ առևտրական կցորդի և Հայաստանի զարգացման հիմնադրամի կողմից: Միջոցառմանը ներկա է եղել ՀՀ էկոնոմիկայի նախարարի տեղակալ Սերգեյ Ավետիսյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր