Հայոց ցեղասպանության 109-րդ տարելիցին նվիրված հիշատակի միջոցառումներ Լյուքսեմբուրգում

24 ապրիլի, 2024

Ապրիլի 23-ին Լյուքսեմբուրգի Գլասի եկեղեցում Հայ առաքելական եկեղեցու հոգևոր հովիվ Տեր Արմենի կողմից մատուցվեց Հայոց Ցեղասպանության նահատակների հիշատակին նվիրված պատարագ։

Լյուքսեմբուրգում ՀՀ դեսպան Տիգրան Բալայանի անունից Լյուքսեմբուրգում ՀՀ դեսպանության գրասենյակի գործերի հավատարմատար Արփինե Խաչատրյանը հանդես եկավ ելույթով, որի շրջանակներում շնորհակալություն հայտնեց Լյուքսեմբուրգի իշխանություններին Հայոց ցեղասպանությունը ճանաչելու և դատապարտելու համար։ Հավելեց, որ Հայոց ցեղասպանությունից ավելի քան 100 տարի անց աշխարհն ականատես եղավ նույն ցեղասպան քաղաքականության և անպատժելիության հետևանքների հերթական դրսևորմանը, երբ Լեռնային Ղարաբաղի հայ բնակչությունը Ադրբեջանի կողմից ենթարկվեց լիակատար էթնիկ զտման։

Նման ոճրագործությունները բացառելու համատեքստում ընդգծելով մեղավորներին պատժելու հրամայականը և այդ նպատակով միջազգային հանրության կողմից առկա ամբողջ գործիքակազմը գործարկելու կարևորությունը՝ նշեց, որ Հայաստանը կշարունակի աշխատել արդարության հաղթանակի ուղղությամբ։

***

Ապրիլի 21-ին Համաշխարհային կրոնների 15-րդ համերգի շրջանակներում Լյուքսեմբուրգի Աստվածամոր տաճարում դուդուկահար Գեղայր Ալեքսանյանի կատարմամբ հնչեց «Դլե յաման» ստեղծագործությունը։

***

Ապրիլի 24-ին Լյուքսեմբուրգի ամենամեծ կրոնական միջոցառման՝ Օկտավի շրջանակներում Աստվածամոր տաճարում Հայ առաքելական եկեղեցու հոգևոր հովիվ Տեր Արմենի կողմից հնչեց Հայոց ցեղասպանության զոհերի ոգեկոչմանը նվիրված աղոթք։

Հայոց ցեղասպանության հիշատակի միջոցառումները կազմակերպվել էին «Association Luxembourg-Arménie»-ի կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր