Դիվանագիտական դպրոցի ունկնդիրները հյուրընկալվեցին Հայաստանի դեսպանությունում

14 մայիսի, 2024

Մայիսի 13-14-ը ՀՀ ԱԳՆ Դիվանագիտական դպրոցի՝ Բրյուսել ուսումնական այցի շրջանակներում, ունկնդիրները հնարավորություն ունեցան հանդիպել ԵՄ խորհրդի, Արտաքին գործողությունների եվրոպական ծառայության, Եվրոպական խորհրդարանի, ՆԱՏՕ-ի գրասենյակի բարձրաստիճան պաշտոնյաներին։

Մայիսի 14-ին տեղի ունեցավ Բրյուսելում Հայաստանի դեսպան Տիգրան Բալայանի հանդիպումը դպրոցի սաների հետ։ Դեսպան Բալայանը համապարփակ ներկայացրեց Հայաստան-ԵՄ հարաբերությունների ներկա կարգավիճակը, ձեռքբերումները, մարտահրավերները և առաջիկա նպատակները։ Նա անդրադարձավ վերջին մի տարվա ընթացքում Հայաստան-ԵՄ գործընկերության աննախադեպ խորացման ընթացքին, այդ թվում՝ մուտքի արտոնագրերի շուրջ երկխոսության մեկնարկի, Եվրոպական խաղաղության գործիքի ուղղությամբ տարվող աշխատանքներին, ապրիլի 5-ի եռակողմ հանդիպման արդյունքներին, ինչպես նաև առաջիկա այցերին։

Դեսպանը նաև մանրամասնեց Բելգիայի և Լյուքսեմբուրգի հետ երկկողմ հարաբերությունների մասին՝ շեշտը դնելով տարբեր ծրագրերի և նախաձեռնությունների վրա։ Պատմեց երկու երկրների հայ համայնքների և տարբեր հայկական կազմակերպությունների հետ համագործակցության յուրահատկությունների մասին։

Դեսպանի հետ հանդիպմանը հետևեց Դիվանագիտական դպրոցի պատվին կազմակերպված ընդունելությունը, որի ժամանակ դպրոցի սաները ծանոթացան ԵՄ կառույցներում Հայաստանի հարցերով պատասխանատուների հետ և վերջիններիս ուղղեցին իրենց հուզող հարցերը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր