Հայաստանի դեսպանի այցելությունը Գենտի համալսարան

09 հոկտեմբերի, 2024

Հոկտեմբերի 9-ին Բելգիայում Հայաստանի դեսպան Տիգրան Բալայանն այցելեց Գենտի համալսարան։

Այցելությունը մեկնարկեց Տիգրան Բալայանի հանդիպումով Գենտի համալարանի ռեկտոր Ռիկ վան դը Վալի և համալսարանի բոլոր գիտակրթական ուղղությունները ներկայացնող պրոֆեսորադասախոսական կազմի հետ։

Ռեկտոր դը Վալը մանրամասն ներկայացրեց Գենտի համալսարանի կառուցվածքը, ծրագրերը և համագործակցության հնարավորությունները։

Դեսպանը հանդես եկավ հետագա համագործակցության վերաբերյալ մի շարք առաջարկություններով։ Առաջարկների շուրջ ծավալվեց համապարփակ քննարկում։ Կողմերը պայմանավորվեցին հաստատել առավել դինամիկ շփում՝ խթանելու համատեղ ծրագրերի իրագործման արագ ընթացքը։

Դեսպան Բալայանը համալսարանի գրադարանին նվիրաբերեց Հայաստանի պատմության վերաբերյալ մեկ տասյակից ավելի գրքեր:

Հանդիպմանը հաջորդեց «Հայաստան-Եվրամիություն գործընկերությունը և հեռանկարները» խորագրով դասախոսությունը, որի ժամանակ դեսպան Բալայանը գիտնականներին և ուսանողներին ներկայացրեց Հայաստանի և ԵՄ-ի հարաբերությունների գրանցած աննախադեպ առաջընթացը։ Մանրամասնեց Համապարփակ և ընդլայնված գործընկերության համաձայնագրով նախատեսված փոխգործակցության և տեղեկացրեց նոր բանակցվող Գործընկերության առաջնահերթությունների փաստաթղթի մասին։

Լսարանի ուշադրությանը ներկայացվեց նաև ՀՀ կառավարության առաջ քաշած «Խաղաղության խաչմերուկ» ծրագիրը։

Դասախոսությունից հետո տեղի ունեցած հարցուպատասխանի ընթացքում Տիգրան Բալայանն անդրադարձավ Հայաստան-Ադրբեջան խաղաղության համաձայնագրի շուրջ տարվող աշխատանքներին, նախորդ տարի Լեռնային Ղարաբաղում Ադրբեջանի կողմից իրականացված էթնիկ զտման հետևանքներին և ԵՄ-ի արձագանքին այդ ողբերգությանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր