Լյուքսեմբուրգում նշվեց Հայաստանի ազգային տոնը

29 սեպտեմբերի, 2025

Սեպտեմբերի 29-ին Լյուքսեմբուրգում կայացավ Հայաստանի Հանրապետության անկախության տոնին նվիրված ընդունելությունը։

Միջոցառմանը ներկա էին Լյուքսեմբուրգի ԱԳՆ ղեկավարությունը, տարբեր գերատեսչությունների պաշտոնյաներ, դիվանագիտական կորպուսի անդամներ, մշակութային և հասարակական կազմակերպությունների և հայ համայնքի ներկայացուցիչներ։

ՀՀ դեսպան Տիգրան Բալայանը իր ողջույնի խոսքում ընդգծեց, որ Հայաստանի և Լյուքսեմբուրգի հարաբերությունները վերջին տարիներին աննախադեպ ակտիվացել են՝ հարստանալով նոր բովանդակությամբ ու փոխայցերով, խորացող քաղաքական երկխոսությամբ, փոխադարձ վստահությամբ և ոլորտային համագործակցությամբ։ Դեսպանը շնորհակալություն հայտնեց Լյուքսեմբուրգի պատգամավորների պալատին և արտաքին գործերի նախարարությանը՝ Հայաստանի հետ հարաբերությունների ամրապնդման գործում ունեցած կարևոր դերակատարման համար։

Դեսպանը իր խոսքում անդրադարձավ նաև տարածաշրջանային գործընթացներին՝ ընդգծելով վաշինգտոնյան համաձայնությունների նշանակությունը կայուն խաղաղության հաստատման համար։ Միևնույն ժամանակ նշեց առկա հումանիտար խնդիրների անհապաղ հասցեագրման կարևորությունը՝ առաջին հերթին հայ պատանդների ազատումը՝ խաղաղության գործընթացը լիարժեք դարձնելու համար։

Դեսպանը նշեց, որ Լյուքսեմբուրգում նախատեսվող նոր Մեծ Դքսի գահակալության մեկնարկը նոր դարաշրջան է Լյուքսեմբուրգի համար, և վստահություն հայտնեց, որ այն կբերի երկրի բարեկեցության աճի և Հայաստանի հետ հարաբերությունների հետագա ամրապնդման։

***

Լյուքսեմբուրգի արտաքին գործերի նախարարության հարգելի՛ գործընկերներ, Պատգամավորների պալատի անդամներ, գերազանցություններ, գործընկերներ, սիրելի՛ ընկերներ, Հայաստանի սիրելի՛ բարեկամներ, Սիրելի հայրենակիցներ,

Ողջույն,

Մեծ հաճույք է երկրորդ տարին անընդմեջ ողջունել ձեզ այստեղ՝ Լյուքսեմբուրգում՝ Հայաստանի Հանրապետության Ազգային տոնի կապակցությամբ։

Եվ սա Հայաստանի և Լյուքսեմբուրգի միջև հարաբերությունների աննախադեպ ակտիվացման լավագույն դրսևորումն է, որին մենք ականատես ենք լինում վերջին տարիներին։ Մեր քաղաքական երկխոսությունը խորացել է՝ ուղեկցվելով փոխադարձ բարձր մակարդակի այցելություններով, որոնք նոր բովանդակություն և ավելի մեծ վստահություն են հաղորդել մեր գործընկերությանը։ Այս դրական դինամիկան նաև ամրապնդվում է այն անկեղծ համերաշխությամբ, որը Լյուքսեմբուրգը միշտ ցուցաբերել է Հայաստանի և նրա մտահոգությունների նկատմամբ՝ ըմբռնում, որն արտահայտվել է ոչ միայն քաղաքական հայտարարություններով, այլև բարեկամության և համագործակցության ոգով, որը միշտ էլ գնահատվել է Հայաստանում։

Այս առումով ես կցանկանայի հատուկ շնորհակալություն հայտնել Լյուքսեմբուրգի Պատգամավորների պալատին և նրա ղեկավարներին մեր երկրների միջև մերձեցման խթանման համար՝ հիմնվելով մեր ընդհանուր արժեքների վրա՝ ժողովրդավարություն, մարդկային արժանապատվություն, միջազգային իրավական կարգ և արդարադատություն։ Իհարկե, մեր գնահատանքն ենք հայտնում նաև Լյուքսեմբուրգի արտաքին գործերի նախարարության գործընկերներին՝ նրանց վճռականության և շարունակական աջակցության համար։

Առաջ նայելով՝ մենք անհամբեր սպասում ենք Լյուքսեմբուրգի վարչապետ պարոն Լյուկ Ֆրիդենի՝ հաջորդ տարի նախատեսված Հայաստան առաջին այցին՝ Եվրոպական քաղաքական համայնքի գագաթնաժողովի շրջանակներում։ Մենք վստահ ենք, որ այս կարևոր առիթը նաև լավ հնարավորություն կծառայի մեր երկկողմ հարաբերությունները հետագայում խթանելու՝ դրանք ռազմավարական գործընկերության մակարդակի բարձրացնելով։

Քաղաքական երկխոսությունից զատ, մենք զարգացնում ենք համագործակցությունը բազմաթիվ ոլորտներում՝ պաշտպանությունից և կիբերանվտանգությունից մինչև մշակույթ և ապակենտրոնացված համագործակցություն։ Միասին մենք նաև առաջ ենք մղում նոր նախագծեր քաղաքացիական պաշտպանության, արտակարգ իրավիճակների կառավարման, տեղեկատվական տեխնոլոգիաների և առողջապահության ոլորտներում։ Եվ որպես մեր հարաբերությունների ոգու և բնույթի իրական արտացոլում, մենք կարծում ենք, որ Լյուքսեմբուրգի մշտական դիվանագիտական ներկայությունը Հայաստանում մեծ նշանակություն կունենա մեր համագործակցությունն ավելի սերտացնելու համար։ Մենք ցանկանում ենք շուտով տեսնել Լյուքսեմբուրգի փոխադարձ մշտական դիվանագիտական ներկայությունը Հայաստանում։

Սիրելի՛ բարեկամներ,

Վաշինգտոնյան համաձայնագրերը, որոնք ստորագրվել են օգոստոսին ԱՄՆ հաջող միջնորդությունից հետո, մեր տարածաշրջանում երկարատև խաղաղություն հաստատելու և ժողովրդավարական և դիմացկուն պետություն կառուցելու անկյունաքարն են։

Դեռ կան ցավոտ իրականություններ, որոնք պետք է լուծվեն հաշտեցման դժվարին ճանապարհին և դիմակայության էջը փակելու հարցում: Ադրբեջանում 23 հայ պատանդների ուշացած ազատ արձակումը հրատապ խնդիր է, որը պահանջում է անհապաղ ուշադրություն և գործողություններ: Մենք անհամբեր սպասում ենք ԵՄ-ի և նրա անդամ պետությունների ավելի ակտիվ ներգրավվածությանը Բաքվում ներկայումս անօրինական պահվող բոլոր հայ քաղաքացիների շուտափույթ հայրենադարձման գործում:

Հարգելի՛ գործընկերներ,

Հայաստան-ԵՄ գործընկերության աննախադեպ առաջընթացը ձևավորում է իմ երկրի ապագան՝ նոր նախաձեռնություններով և արդյունքներով:

Եվրոպայի հետ մեր ընդլայնվող համագործակցությունը Հայաստանը դարձնում է ավելի դիմացկուն, ավելի ինքնաբավ և պակաս կախված, և հենց դա է իրական անկախությունը:

Այս բոլոր քայլերը ամուր հիմք են հանդիսանում ԵՄ-ի և Լյուքսեմբուրգի միջև մեր հարաբերությունները ռազմավարական գործընկերության նոր մակարդակի բարձրացնելու համար:

Հարգելի՛ բարեկամներ,

Մի քանի օրից Լյուքսեմբուրգը կնշի նոր Մեծ Դքսի գահակալության սկիզբը, այս գեղեցիկ երկրի համար նոր դարաշրջան և մի պահ՝ մտորելու Մեծ Դքս Հենրիի գահակալության վերջին 25 տարիների մասին, որին ես պատիվ ունեցա հանձնել իմ հավատարմագրերը գրեթե հինգ տարի առաջ: Վստահ եմ, որ նոր կառավարումը Լյուքսեմբուրգին կբերի ավելի մեծ բարգավաճում և Հայաստանի հետ ավելի սերտ գործընկերություն։

Իմ գործընկերները և ես ջանք չենք խնայի այս ուղղությամբ։ Հետևաբար, խնդրում եմ ձեզ բարձրացնել ձեր բաժակները Հայաստանի, Լյուքսեմբուրգի և մեր երկրների ու ժողովուրդների միջև հավերժական բարեկամության համար։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր