Դեսպան Բալայանի հանդիպումը Վալոնիայի կառավարության ղեկավար Ադրիեն Դոլիմոնի հետ

15 սեպտեմբերի, 2026

Սեպտեմբերի 15-ին դեսպան Տիգրան Բալայանը հանդիպում ունեցավ Վալոնիայի կառավարության ղեկավար Ադրիեն Դոլիմոնի հետ։

Հանդիպմանը քննարկվեցին Հայաստանի և Վալոնիայի միջև զարգացող առևտրատնտեսական համագործակցության առավել խորացմանն ուղղված համատեղ աշխատանքները։ Զրուցակիցները անդրադարձ կատարեցին Վալոնիայի ռազմարդյունաբերական համալիրի հետ հաստատված արդյունավետ համագործակցությանը և այն ընդլայնելու հնարավորություներին։ Այս համատեքստում դեսպան Բալայանը ներկայացրեց Հայաստանի ռազմարդյունաբերության նվաճումները և այդ ուղղությամբ փոխգործակցելու պատրաստակամությունը։

Վարչապետ Դոլիմոնը և դեսպան Բալայանը հանգամանալից անդրադարձ կատարեցին գիտակրթական և գործարար կապերի ամրապնդման ոլորտներում կապերի աշխուժացմանը՝ այդ առումով կարևորելով միմյանց արտադրանքի ճանաչելիության բարձրացմանն ուղղված միջոցառումների կազմակերպման հրամայականը։

Կողմերն անդրադարձան նաև բարձր տեխնոլոգիաների և նորարարության ոլորտներում փոխշահավետ ծրագրերի իրականացման հնարավորություններին։

Խոսելով Լյեժում Վալոնիայի կառավարության մասնկացությամբ ԹՈՒՄՈ կենտրոնի բացման մասին՝ դեսպան Բալայանն ընդգծեց Հայաստանի բարձր տեխնոլոգիական և արհեստական բանականության էկոհամակարգի աճող պոտենցիալը և այն Վալոնիայի հետ որպես փոխգործակցության առաջատար ուղղության դիտարկումը ։

Հանդիպման ավարտին դեսպան Բալայանը շնորհակալություն հայտնեց Հայաստանին աջակցող նախաձեռնություններին սատարելու և ՀՀ կառավարության անունից հրավիրեց Վալոնիայի կառավարության ղեկավարին Ֆրանկոֆոնիայի խաղերի կապակցությամբ այցելել Հայաստան։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձեվեր